Es geht los

So ehr Leit, es geht los: mer machen unser Straußwirtschaft am 3. Juni 2021 uff. Awwer nur bis zum 18. Juli. Des langt ämol. Mer esch ä bissel kriwwelich im Bauch. Jeder, wu zu uns in die Straußwirtschaft kumme will, muss am Eigang kontrolliert werre! Do brauchen mer jo glatt än Security-Man. Also, wann ehr kumme winn: nur mit gültigem Negativ-Test odder Impfpass mit beiden Corona-Impfungen odder Bescheinigung iwwer ä iwwerstanneni Corona-Erkrankung. Wie die ausehe soll wäs ich ach nit. Vielleicht mit ännere positive Testbescheinigung un ännere negative? Also zwä Zettel.

Wie gsacht - ä - gschriwwe - mer esch ä bissel kriwwelich. Ja, unn s Wetter esch ach nix zum drauß sitze!. Im Garte kennt ich ball Reis planze. Die Schnegge machen renne un die Wielmaus frisst alles ab. Un manche Hunde mänen, des esch ä Klo.

Ich wäs: POSITIV denken! Verlängert das Leben. Also: Wann´s rechent esch die Luftfeuchtichkeit hoch un des esch gut fer die Haut. Außerdem griecht känner Sunnebrand. Spart widder Sunnemilich. Un gieße missen mer ach nit! Alles wird gut! De Rescht vergessen mer äfach mol. In diesem Sinne: lächeln! Das ist die schönste Art andern die Zähne zu zeigen. :-)